Во рамки на овогодинешната конференција на MBT Асоцијацијата, организирана од ОИВ Хрватска и одржана во Опатија од 21 до 24 мај, Република Северна Македонија доби официјална покана за приклучување кон оваа значајна регионална платформа.

Претседателот на МБТ Асоцијацијата, г. Mihael Jančić, со особено задоволство ја упати поканата до македонската делегација, која беше свечено прифатена од страна на директорот на ЈП Национална Радиодифузија, г. Јусуф Сопи. Со ова, нашето јавно претпријатие станува новиот официјален член на Асоцијацијата.
Директорот на Управата на ОИВ Хрватска, г. Мате Ботица, ја поздрави оваа одлука и изрази уверување во успешната и плодна соработка во периодот што следува.

Ова членство претставува значаен чекор во стратешките заложби на директорот Сопи за унапредување на улогата на Националната Радиодифузија и поврзување со сродни институции на Балканот. Тоа ја потврдува континуираната определба за регионално поврзување, дигитален развој и професионална соработка.

Вреди да се потсетиме дека токму во Македонија беше одржан првиот состанок на операторите од регионот, кој беше поттикнат токму по иницијатива на нашата институција. Таа иницијатива прерасна во идеја за оформување на МБТ Асоцијацијата – процес кој денес резултира со нашето полноправно членство во семејството на јавни радиодифузери од регионот, таму каде што припаѓаме.

Особено ја нагласуваме одличната комуникација и дотогашната соработка со ОИВ Хрватска, како и потенцијалните нови проекти со останатите членки на МБТ Асоцијацијата.